Askofu Dr. Charles Jangalason ni jina maarufu katika tasnia ya muziki wa injili Tanzania, akijulikana kwa nyimbo zake zenye mafundisho makali na mifano halisi inayowaonya waumini. Akihimili misukosuko katika safari yake ya muziki, Jangalason ametoa albamu 14, huku wimbo wake maarufu Usimuige Mbuzi ukimtambulisha zaidi kwa mashabiki wa muziki wa injili.
Mzaliwa wa Kigoma na mtoto wa mchungaji, Jangalason alianza rasmi kuimba na kurekodi muziki mwaka 1985. Albamu zake maarufu ni pamoja na Usiwe Kama Popo, Dungwa Sindano, Vaa Kiatu, Tibu Masikio, Sugua Meno, Jifunze kwa Kuku, na Fukuza Mpangaji. Mwaka 1997, alitoa albamu iliyofanya vizuri zaidi, ikiwemo wimbo Taifa Teule, ambao ulimpatia nafasi ya kutambulika zaidi baada ya kuvutia Askofu Moses Kulola, licha ya hapo awali kufukuzwa kwenye mikutano yake zaidi ya sita kutokana na ujumbe wake mkali.
Mbali na muziki, Jangalason ni mwanzilishi na askofu wa makanisa ya Hope for All Nations. Katika kizazi cha sasa cha wanamuziki wa injili, ameeleza kuvutiwa zaidi na Ambwene Mwasongwe, anayemwona kama msanii mwenye ujumbe wa kina katika nyimbo zake.
Safari yake ya muziki imekuwa ya kipekee, akibaki kuwa mwimbaji anayejitofautisha na wengine kwa mtindo wake wa kufundisha kupitia nyimbo, huku akibariki na kugusa maisha ya wengi nchini Tanzania.
0 Comments